Oras de chamin: 7
Deslivèl a la montaa: 2100 m
Deslivèl a la valaa: 1750 m

Lo chamin

Derant de partir, a Vinai se vísita lo fòrt Albertin, bastit entre lo 1834 e lo 1847 per iniciativa dal rei Carl Albèrt de Savòia. Sa linha de barratge, articulaa en bastionaas, fossats, chaminaments, es lònja, en linha d’aire, mai d’un quilomètre. Foguet pas jamai armat e auguet pas lo batesme dal fuec. Encuei òspita d’exposicions e de manifestacions culturalas.

Da la parroquiala de Vinai (910 m), titolaa a St. Florenç (XIV-XVII sèc.), se monta al lòng d’la via asfaltaa per Neraissa. Da un tornant se seguís lo viòl que monta sal versant orogràfic drech dal valon. Se tochon las roïnas des granjas de Lentre, puei se monta sus un crest resut en passant per la ruaa abandonaa de Chastelar (1370 m) e en trobant mai la via asfaltaa pauc derant de la ruaa de Neraissa Inferiora (1433 m), ente se tròbon qualquas maisons sobreviscuas embe lhi cubèrts de palha de sèel. D’aquí se monta per una dralha sal versant orogràfic drech dal valon fins al còl de Neraissa 2015) , per contuniar a mesa còsta fins al còl Chardoleta (1761 m). Se davala a la ruaa de St. Ana de Sambuc (1432 m) ente vai trapar lo viòl des nòu ruaas de Sambuc. Se travèrsa a mesa còsta lo valon de la Madòna, per contuniar encara a mesa còsta amont de Sambuc, en tochant las ruaas abandonaas de Golàs (1349 m) e Sèrre Boisson (1365 m). Se contúnia sus una pista forestala, puei sus una dralha fins a la ruaa de Sèrre (1419 m). Embe un viòl panoràmic a mesa còsta s’arriba a Morilhon de Fons (1332 m), puei sus una dralha a Morilhon St. Lorenç (1414 m). Da la ruaa se cala sus asfalt fins a Peirapuèrc ( 1246 m), embe un brèu tòc de SS 21.

Minjar e durmir

A Vinai

Albergo Chalet Monte Nebius,
via Roma 9, tel. 0171 959362 info@naturavventura.com, www.naturavventura.com.

Albergo Ligure,
via Vittorio Emanuele 3, tel. 0171 959149, ligure.hotel@libero.it.

A Peirapuèrc

Locanda Occitana Regina delle Alpi
via Nazionale 3, tel.0171 96618 reginaalpi@libero.it www.reginadellealpi.com.

Campeggio Cento Sentieri
Via Nazionale.

Posto tappa GTA
Le Barricate, Ruaa de Pontbernard, tel. 0171 96616.